DEBATE ON WILAYAT E IMAM ALI(as)
Mohammmed: Assalamo
alaikum Osman, kaho kaise ho?
Osman: Wa alaikum
salaam Mohammmed Allah ka ehsaan hai, theek hoon, ye itni raat ke waqt kahan se aarahe ho?
Mohammmed: Ek mehfil-e
milaad mein gaya thaa.
Osman: Ye Rajab mein kiski milaad thee?
Mohammmed: Hamare pehle
Imam Hazrat Ali (a) ki milaad.
Osman: Iska mutlab
hai ki tum Shia ho?
Mohammmed: Al Hamd-o
Lillah.
Osman: Yaar tum Shia loag bhi bade ajeeb ho, hazrat Ali (a)
ko Rasool(s) se bhi badha dete ho aur Allah ka shukr bhi ada karte ho.
Mohammmed: Humloag unhein
badha nahin dete balki tum loag Rasool (s) ka maqaam cum kerdete ho is liye
tumhein aysa mehsoos hota hai.
Osman: Kya tum loag
ye nahin kehte ki unhon ne apna nafs Allah ko baich diya ya ye ki wo momineen
ke moula hain ya phir ye ki unki muhabbat wajib hai waghaira waghaira?
Mohammmed: Be shak, hum apni taraf se kuch nahin kehte, jo Allah
aur Rasool (s) kehte hain hum bhi wohi kehte hain.
Osman: kya tum ye baat sabit kersakti ho?
Mohammmed: haan
Osman: kaise?
Sirf tumhari kitabon se ya quraan se
bhi?
Mohammmed: Quraan se aur
agar zaroorat ho to tumhari kitabon se bhi.
Osman: achcha ye
bataao ki Allah ne unka nafs kab khareeda thaa? Quraan mein iska zikr kahan
hai?
Mohammmed: Sura-e Baqarah
ki aayat No. 207 mein Allah kehta hai " wa min-an-naas-e---" jiska
mutlab hai "Aur logon mein wo bhi hain jo apne nafs ko
marzi-e parwardigaar ke liye bech dalte hain aur Allah apne bandon per bada
mehrbaan hai".Tumhein pata hai ye Aayat kab naazil huwi?
Osman: Nahin tum hi
batao.
Mohammmed: Jab Macca ke
Quraish ne Huzoor(s) ke qatl ka mansooba banake her qabile se aik aik aadmi ko
jama kiya, raat ke waqt talwarein leker ghar ko gher liya taaki subha hote hi
ander ghus ker Huzoor (s) ko qatl kerdein, Allah ne Jibreel ke zariye Huzoor(s)
ko hukm diya ki apne bister per hazrat Ali (a) ko sulaa ker aap Madine chale
jayen, Huzoor ne jub ye baat Hazrat Ali(a) ko batayee to unhon ne poocha
"kya aap ki jaan buch jaayegi?" Huzoor (s) ne kaha "haan ye
Allah ka waada hai", isper hazrat Ali (a) ne shukr ka sajda adaa kiya aur
bade aaraam se unke bister per so gaye, Khuda ne Jibraeel aur Mikaaeel se
poocha "tum mein se kaun hai jo apne bhai ke liye apni jaan qurbaan kerne
ko taiyaar hai?" unmein se koi bhi raazi na huwa, isper khuda ne fakhr
karte huwe unhein hukm diya ki wo donon hazrat Ali (a) ki hifazat karein aur ye
aayat naazil huwi.
Osman: ye to waqiee badi himmat ki baat hai, achcha ab ye
bataao ki unhein mumineen ka wali jo kehte ho isper bhi koi daleel hai?
Mohammmed: Sura-e Maaida
ki aayat No. 55 mein Allah irshad fermata hai "Innamaa waliyokumullah------"
jiska mutlab hai " ay Imaan walo tumhara wali to bus Allah hai aur uska
Rasool aur wo mumineen jo namaaz qayam karte hain aur haalat-e rukoo mein
zakaat dete hain" tumhare mash-hoor mufassir Fakhruddin raazi likhte hain
ki ye aayat hazrat Ali(a) ki shaan mein nazil huwi jab aap ne haalat-e rukoo
mein apni angothi khairaat kit hi.
Osman: Chalo yaan tak
to theek hai magar tum loag Khalifa aur Jaanasheen_e Rasool (s) kaise kehte ho?
Wo to hazrat-e Abu Bakr thay phir unke baad hazrat-e Umar huwe aur---
Mohammmed: Saara fasaad
yahin se shuroo huwa, tumhein pata hai Ghadeer_e Khum per kya huwa?
Osman: nahin tum hi bataao.
Mohammmed: Mekke se Madine ke raaste mein ek maqaam padta hai jiska
naam Ghadeer_e Khum hai, jab Huzoor(s) Haj se waapasi mein wahan pahunche tab
Jibraeel aayat-e "Balligh" leker nazil huwe, sura-e maaida ki 67 th
aayat hai jiska tarjuma ye hai "ay Rasool aap us hukm ko pahuncha dein jo
aap ke parwardigaar ki taraf se naazil kiya gaya hai aur agar aap ne ye na kiya
to Allah ka koi bhi paigham nahin pahunchaya aur Khuda aapko logon ke sharr we
mahfooz rakhega ki Khuda kafiron ki hidayat nahin kerta" jub itna sakht
hukm mila jismein ek tanbih bhi thi to Rasool(s) wahin ruk gaye, jo aage badh
gaye thay unko wapas bulaya aur peechhe aane walon ka intizar kiya, jub aik
laakh chalees hazaar haji jama hogaye to Huzoor (s) ne ek bahut laanba khutba
diya phir un se poochha "kya main tumhare ooper khud tum se ziyada ikhtiyar
nahin rakhta? Sub ne kaha "be shak ae Allah ke Rasool (s) aap rakhte
hain" 3 baar ye iqraar lene ke baad Rasool ne kaha "abhi abhi
Jibraeel aaye thay aur unhon ne Allah ka ye paigham diya hai ki mai Ali (a) ko
apna Jaanasheen bana doon pus jis jis ka main moula hoon us us ke aaj se ye Ali
(a) bhi moula hain" ye kehker Nabi ne donon bazoo pakad ker hazrat Ali (a)
ko itna buland kiya ki khud unke peechhe chip gaye aur saare majme ko hazrat
Ali (a) ka chehra bhi saf saf dikha diya, phir wahan ek khaima lagaker hazrat
Ali ko usmein bithadiya aur tamam logon ko hukm diya ki "Ameerul mumineen"
kehker unke haath per bai'at karein aur unhei mubarakbaad dein, hazrat Abu Bakr
aur Umar sabse pehle mubarakbaad dene walon mein thay aur unhon ne kaha
"mubarak ho ae Abu Talib ke farzand ki aap mere aur tamaam mumineen ke
moula ho gaye" uske fouran baad aayat
"al yaum-o akmalto lakum----" naazil huwi yaani deen-e Islaam
kaamil ho gaya. Ye qafila teen din tak wahin ruka raha aur hazrat Ali (a) ko
mubaraakbaad dene ka slisila jaari raha.
Osman: Ye kaise mumkin hai ki un donon ne mubarakbaad di aur
phir usko bhulaa ker khud khalifa ban baithe?
Mohammmed: haan yehi to mushkil hai, jab Rasool (s) ki wafaat ho
gaiee aur Imam Ali (a) apne khaas ashaab ki madad se Nabi (s) ke ghusl-o kafan
mein lage huwe thay tab ye loag saqif mein jama ho ker khilafat ki taqseem kar rahe
thay unmein se koi bhi rasool (s) ke janaze mein shareek nahin thaa.
Osman; agar tum buraa na mano to ek baat kahun?
Mohammmed: kaho.
Osman: aise lagta hai jaise ye sub batein tum shia kitabon
se suna rahi ho.
Mohammmed: achcha kiya jo pooch liya, hum shia kabhi bhi sirf apni
kitabon se suboot nahin dete, ye saari baatein tumhari kitabon mein bhi moujood
hain, Ahmed ibne Hambal, Nisaaiee, Tirmizi, Ibn_e Maaja aur Fakhruddin Raazi
jaison ne bhi ye batein likhi hain.
Osman: mere ek dost ke paas Musnad Ahmed Ibne Hambal aur
Sahih Tirmizi ke urdu tarjume hain main unmein dekhungi.
Mohammmed: zuroor dekho aur agar doosri kitabon ke tarjume bhi
chahiye to main wo bhi laaker doongi.
Osman: theek hai, yaar do ek baatein aur bhi batado.
Mohammmed: poochho.
Osman: Hazrat Ali (a) ki muhabbat ke wajib hone per bhi koi
daleel hai tumhare paas?
Mohammmed: haan hai, jab Madine ke kuch ameer loagon ne Huzoor
(s) se kaha ki aap ne hum per bada ehsan kiya ki hum gumraah thay aur aap ne
humari hidayat ki,ab hum aapko un mehnaton ka ajr dena chahte hain aap jo bhi
mangein hum dene ke liye taiyaar hain, maangiye, Huzoor (s) kuch der khamosh
rahe, Jibraeel aayat "Qul Laa As-alokum---" leker naazil huwe jiska
tarjuma ye hai ki "aap kehdijiye ki main tum se is tableegh-e risalat ka
koi ajr nahin chaahta alawa iske ki mere aqruba se mawaddat rakho" jab
Huzoor (s) se poochha gaya ki aapke aqruba kaun hain to Huzoor ne farmaya
Ali(a) Fatima (a) Hasan (a) aur Husain (a), Kashshaaf, Bahr-al muheet aur Tafseer-e
Kabeer mein bhi iska zikr moujood hai, hazrat Ali (a) ke ilm ke barey mein
Allah sura-e Yaaseen ki 12th aayat mein irshad farmata hai " Wa
Kulla shayin----" Yaani "aur hum ne her shai ko ek roushan Imam mein
jama kardiya" yahan roushan Imam se muraad Imam Ali (a) aur unki aulaad
mein 11 Imaam hain, iske bhi kuch hawaale chahiye?
Osman: nahin yaar yehi kaafi hai, mu'aaf kerna main ne tumhein
kaafi takleef dee.
Mohammmed: nahin ismein takleef ki kya baat hai? Mujhe khushi hai ki mai
tumhare kuch kaam aasaki, kisi waqt bhi aur maaloomaat chaho to bataao main
madad karne ke liye taiyaar hoon.
Osman: bahut bahut shukriya Mohammmed Khuda hafiz.
Mohammmed: Khuda hafiz fi hifzillah.